ಇನ್ನೊಂದು ಅಕ್ಷರಂಗಳ

"ಸುಪ್ತದೀಪ್ತಿ"ಯ ಕಿಟಕಿ->->->

Tuesday 6 January, 2009

ಹಿಮಾವೃತ ಪಯಣ



ಎಲ್ಲ ಬೆಳಗುವ ಸೂರ್ಯನ ಸುತ್ತ

ಕಟ್ಟಿದ ಮೋಡದಿಂದ ಬಿದ್ದದ್ದು

ಕೊರೆಯುವ ಛಳಿ ಹಿಡಿಸಿ ನಡುಗಿಸುವ ಹಿಮ

ಕರಗಿ ಹರಿದರೆ ನೀರಾದರೂ ಆದೀತು

ಬೆಟ್ಟದ ತಣ್ಣನೆ ಗಾಳಿಯಲ್ಲಿ ಅದೂ ಸಾಧ್ಯವಿಲ್ಲ


ನೋಟ ಹರಿದಷ್ಟೂ ಬಿಳಿಯ ರಾಶಿ

ದೂರದ ಬೆಟ್ಟ ನುಣ್ಣಗೆ, ಬೆಣ್ಣೆನುಣ್ಣಗೆ

ಎಲ್ಲ ತಗ್ಗು ದಿಣ್ಣೆಗಳನ್ನೂ ಸೇರಿಸಿ

ಆವರಿಸಿ ಹೊದೆಸಿ ಬಿಮ್ಮಗೆ ಕೂತ ಹಿಮ

ರವಿ ಇಣುಕಿದರೆ ಕಣ್ಣಿಗೇ ರಾಚುವ ಬೆಳಕು


ಮಸುಕು ಮಸುಕು, ಮುಸುಕಿದ ಮಂಜು

ಮೈಲರ್ಧದ ಆಚೆಗೇನೂ ಕಾಣದ ಪರದೆ

ತೆಳುವಾಗಿ ಹರಡಿದ ಮಾಯಾ ಜಾಲ

ಪ್ರತಿಫಲನದ ಪ್ರತೀಕ್ಷೆಯಲ್ಲಿಯೇ

ಎಗರಾಡದೆ ನಯವಾಗಿಯೇ ಹರಿಯುವ ಬಂಡಿ


ಎತ್ತರ ಗುಡ್ಡದ ನೆತ್ತಿಯ ಬದಿಯಲ್ಲಿ

ಕಿರುತಿರುವಿನ ರಸ್ತೆಯಂಚಿನ ಬೇಲಿ

ತಡೆಯೇ ತಿಳಿಯದಂತೆ ತೇಲಿಹೋದದ್ದು

ಕನಸೊ? ಕಲ್ಪನೆಯೊ? ಬದುಕೊ?

ಕೊರೆವ ಗಾಳಿಯೊಳಗೆ ಗುರುತುಗಳಿಲ್ಲ

(೦೫-ಜನವರಿ-೨೦೦೯)

9 comments:

Sushrutha Dodderi said...

ಕನಸೋ? ಕಲ್ಪನೆಯೋ? ಬದುಕೋ?
-ಹೌದಲ್ವಾ ಜ್ಯೋತೀಜೀ? ಗುರುತುಳಿಸದೇ ತೇಲಿ ಹೋದದ್ದು ಏನು ಬೇಕಾದರೂ ಆಗಬಹುದಲ್ವಾ?

ಇಷ್ಟವಾಯ್ತು ಕವಿತೆ..

sunaath said...

ಇದು ಮೂಕವಿಸ್ಮಯ.
ಸುಂದರವಾದ ಭಾವಾಭಿವ್ಯಕ್ತಿ.

ಶಾಂತಲಾ ಭಂಡಿ (ಸನ್ನಿಧಿ) said...

ಸುಪ್ತದೀಪ್ತಿಯವರೆ...

"ತಡೆಯೇ ತಿಳಿಯದಂತೆ ತೇಲಿಹೋದದ್ದು

ಕನಸೊ? ಕಲ್ಪನೆಯೊ? ಬದುಕೊ?

ಕೊರೆವ ಗಾಳಿಯೊಳಗೆ ಗುರುತುಗಳಿಲ್ಲ"

ಈ ಸಾಲುಗಳು ಹೆಚ್ಚು ಇಷ್ಟವಾದವು.
ಅದೆಲ್ಲಿ ಸಿಗುತ್ತವೆ ಇಷ್ಟು ಚೆಂದದ ಸಾಲುಗಳು!

ಸುಪ್ತದೀಪ್ತಿ suptadeepti said...

ಸುಶ್, ಕಾಕಾ, ಶಾಂತಲಾ, ಮೂವರಿಗೂ ಧನ್ಯವಾದಗಳು.

sritri said...

ಹಿಮಾವೃತ ದಾರಿಯ ಪಯಣದ ಸುಂದರ ವರ್ಣನೆ. ಸೂರ್ಯನಿಗೂ ಚಳಿ ಬರಿಸುವ ಬೆಳ್ಳನೆ ಹಿಮರಾಶಿಯ ಚಿತ್ರ ಇನ್ನಷ್ಟು ಸ್ಫುಟವಾಗಿದ್ದರೆ ಚೆನ್ನಾಗಿತ್ತು.

ಸುಪ್ತದೀಪ್ತಿ suptadeepti said...

ಧನ್ಯವಾದ ವೇಣಿ.
ನೀನು ಹೇಳಿದ್ದು: "ಸೂರ್ಯನಿಗೂ ಚಳಿ ಬರಿಸುವ ಬೆಳ್ಳನೆ ಹಿಮರಾಶಿಯ ಚಿತ್ರ ಇನ್ನಷ್ಟು ಸ್ಫುಟವಾಗಿದ್ದರೆ ಚೆನ್ನಾಗಿತ್ತು."
ನಾನು ಹೇಳೋದು: ಉತ್ತರ ಕವನದಲ್ಲೇ ಇದೆ--
"ಮಸುಕು ಮಸುಕು, ಮುಸುಕಿದ ಮಂಜು

ಮೈಲರ್ಧದ ಆಚೆಗೇನೂ ಕಾಣದ ಪರದೆ

ತೆಳುವಾಗಿ ಹರಡಿದ ಮಾಯಾ ಜಾಲ"
-- ಇಂಥ ವಾತಾವರಣದ ಸ್ಫುಟಚಿತ್ರ, ಅದೂ ಚಲಿಸುತ್ತಿರುವ ಕಾರಿನಿಂದಲೇ ತೆಗೆದಾಗ, ಹೇಗೆ ಇರಬಹುದು? ಅದನ್ನೇ ಇಲ್ಲಿ ಹಾಕಿದ್ದು.

ಸುಪ್ತದೀಪ್ತಿ suptadeepti said...

ಧನ್ಯವಾದ ಶಂಕರಣ್ಣ. ಹೀಗೇ ಬರುತ್ತಿರಿ, ಕಮೆಂಟ್ಸ್ ಬರೆಯುತ್ತಿರಿ.

ತೇಜಸ್ವಿನಿ ಹೆಗಡೆ said...

ಅಕ್ಕಾ,

ಕವನ ತುಂಬಾ ತುಂಬಾ ಚೆನ್ನಾಗಿದೆ. ಕೊನೆಯ ಸಾಲುಗಳು ಮತ್ತೂ ಇಷ್ಟವಾದವು.

ಸುಪ್ತದೀಪ್ತಿ suptadeepti said...

ಧನ್ಯವಾದಗಳು ತೇಜು.